Jio Giga Fiber broadband will come with a set top box for TV

Aaj Reliance ki AGM (Annual General Meeting) ke dauraan, company ke Chairman aur MD, Mukesh Ambani ne kayi important announcements ki jismein sabse khaas hai, Jio GigaFiber ka official launch.

Sabse pehle Mukesh Ambani ne apni company ko customer-obsessed organization bataate huye Jio GigaFiber, jo ki ek wired home broadband service hai, ki announcement ki. Saath hi ye bhi bataaya ki company ne pichle ek saal mein apne customer base ko double kiya hai aur is aane waali Jio GigaFiber service mein bhi company aapko most advanced fiber-based broadband service dene waali hai.

Jio aane waale kuch hi samay mein India ki 1100 cities mein fiber-to-the-home (FTTH) broadband service provide karega. Jio GigaFiber ke saath aapko GigaFiber router aur GigaTV set-top box lena hoga aur is set-top box ki help se aap video calling kar sakte hain. Isi ke saath GigaTV subcribers iske saath aane waale remote control mein lage microphone ke zariye voice command ki help se Jio ki sabhi apps open kar sakte hain, jaise ki Jio TV, Jio Cinema, Jio News, etc. Sabhi important entertainment, sports aur news channels Jio TV mein milne ke baad aapko DTH recharge karaane ki bhi koi zaroorat nahin rahegi.

Iske alawa Jio GigaFiber mein aapko voice-activated virtual assistant, virtual reality gaming and shopping, multi-party video conferencing jaisi services bhi milti hain. Saath hi ismein aap VR headsets bhi connect kar sakenge, jiske baad aap 360 degree content 4K resolution mein dekh sakte hain.

Company ke according GigaFiber ki testing kayi months se chal rahi hai, jo ki safal rahi hai aur iske baad aaj iski official announcement ki gayi hai. Jio GigaFiber mein 1Gbps tak ki speed aapko milegi aur ye homes, merchants, small / medium / large enterprises sabhi ke liye available hoga. GigaFiber ki registrations 15^th of August se My Jio app aur Jio.com par start hongi.